તાપી સોનગઢ
‘સેવા સંકલ્પ અભિયાન’ અંતર્ગત તાપી જિલ્લાના સોનગઢ અને ઉચ્છલ તાલુકામાં તાલુકાકક્ષાના ૭૭મા વન મહોત્સવ-૨૦૨૬ માં રમતગમત, યુવક સેવા અને સાંસ્કૃતિક પ્રવૃત્તિઓ તથા પ્રવાસન રાજ્યકક્ષાના મંત્રી ડૉ. જયરામભાઈ ગામીતે ‘એક પેડ માં કે નામ ૩.૦’ અભિયાન હેઠળ બંને સ્થળોએ વૃક્ષારોપણ કરી પર્યાવરણ સંરક્ષણનો સંદેશ આપ્યો હતો.
આ પ્રસંગે રાજ્યકક્ષાના મંત્રી ડૉ. જયરામભાઈ ગામીતે જણાવ્યું કે, દેશના વિકાસમાં યુવા પેઢી મહત્વની ભૂમિકા ભજવશે. યુવાનો સ્વચ્છતા અને પર્યાવરણ સંરક્ષણ જેવી પ્રવૃત્તિઓમાં સહભાગી બની પોતે જાગૃત થાય અને અન્ય લોકોને પણ જાગૃત કરે તે જરૂરી છે. તેમણે વધુમાં જણાવ્યું કે, વડાપ્રધાન નરેન્દ્રભાઈ મોદીના વિકસિત ભારતના વિઝનને સાકાર કરવા માટે સરકારની વિવિધ કલ્યાણકારી યોજનાઓનો લાભ લેવા સાથે અન્ય લોકોને પણ તેનો લાભ લેવા માટે જાગૃત કરવા જોઈએ.
સોનગઢ ખાતે સામાજિક વનીકરણ રેન્જ, સોનગઢ તથા સરકારી વિનયન અને વાણિજ્ય કોલેજના સંયુક્ત ઉપક્રમે યોજાયેલા વન મહોત્સવમાં મંત્રીએ કોલેજ પરિસરમાં વૃક્ષારોપણ કર્યું હતું. ઉચ્છલ તાલુકાનો તાલુકાકક્ષાનો વન મહોત્સવ દેવમોગરા કોલેજ ખાતે યોજાયો હતો. અહીં પણ મંત્રીએ વૃક્ષારોપણ કરી વિદ્યાર્થીઓ તથા ગ્રામજનોને પર્યાવરણના જતન અને સંરક્ષણ માટે સંકલ્પબદ્ધ થવા પ્રેરિત કર્યા હતા.
બંને તાલુકા કક્ષાના વન મહોત્સવ કાર્યક્રમોમાં મંત્રી સાથે સોનગઢ નગરપાલિકા પ્રમુખ સારિકાબેન પાટીલ, જિલ્લા અગ્રણી સુરજભાઈ વસાવા, ચીફ ઓફિસર સહદેવસિંહ વનાર, મામલતદાર આનંદકુમાર સહિત સંબંધિત વિભાગના અધિકારીઓ, જનપ્રતિનિધિઓ, હોદ્દેદારો, ગ્રામજનો અને વિદ્યાર્થીઓ ઉપસ્થિત રહ્યા હતા.
