વ્યારા વિકાસ શાહ
આ પ્રસંગે જિલ્લા મહિલા અને બાળ અધિકારીશ્રી જિલ્લા મહિલા અને બાળ અધિકારી સુલોચના એસ. પટેલે જિલ્લામાં આવેલી તમામ સરકારી કચેરીઓમાં આંતરિક ફરિયાદ સમિતિની અવશ્ય રચના કરવા તથા તેની સંપૂર્ણ માહિતી જિલ્લા મહિલા અને બાળ અધિકારીની કચેરીમાં મોકલવા અનુરોધ કર્યો હતો.
કાર્યક્રમમાં ઉપસ્થિત ચીફ લીગલ એઇડ ડિફેન્સ કાઉન્સેલર નિલેશ જે. પટેલ દ્વારા કામકાજના સ્થળે મહિલાઓની જાતીય સતામણી અધિનિયમ–૨૦૧૩ અંતર્ગત આંતરિક સમિતિની રચના કેવી રીતે કરવી,સમિતિમાં કેટલા સભ્યો હોવા જોઈએ ફરિયાદ કઈ રીતે લેવી ફરિયાદ પ્રાપ્ત થયા બાદ શું કાયદેસર કાર્યવાહી કરવી તે અંગે વિસ્તૃત અને વ્યવહારુ કાયદાકીય માર્ગદર્શન આપવામાં આવ્યું હતું.
વધુમાં તેમણે આ અધિનિયમ હેઠળ ફરિયાદ નોંધણીની પ્રક્રિયા, કાયદાના ઉલ્લંઘન બદલ લાગુ પડતી શિક્ષાઓ અંગે માહિતી આપી તેમજ મહિલાઓને જાતીય સતામણી સામે જાગૃત અને સશક્ત બની આંતરિક સમિતિ અથવા પોલીસમાં ફરિયાદ કરવા પ્રોત્સાહન આપ્યું હતું.
જિલ્લા મહિલા અને બાળ અધિકારીના ફિલ્ડ ઓફિસર વિપુલ એ. મકવાણા દ્વારા જિલ્લા સ્તરે આવેલી તમામ સરકારી, ખાનગી તથા ઔદ્યોગિક સંસ્થાઓમાં આંતરિક સમિતિની રચના અને તેની નિયમિત બેઠક યોજવા અંગે માર્ગદર્શન આપવામાં આવ્યું હતું.તેમણે દરેક કાર્યસ્થળે અધિનિયમની જોગવાઈઓ અને આંતરિક સમિતિની વિગતો દર્શાવતા માહિતી બોર્ડ જાહેર રીતે દેખાય તે રીતે લગાવવા પર ભાર મૂક્યો હતો.
કામકાજના સ્થળે જાતીય સતામણી નિવારણ સંબંધિત ફિલ્મનું નિદર્શન કરવામાં આવ્યું હતું. જિલ્લાની વિવિધ સંકલન કચેરીઓની આંતરિક સમિતિના તમામ સભ્યોએ સેમિનારમાં હાજરી આપી અને કાર્યક્રમને સફળ બનાવ્યો હતો.
